LAOAG CITY – Naragsak nga inpakaammo ni Engr. Neil Jose, ti Pugad Lawin – Ilocos Norte Chapter nga adda ti 98 nga ubbing ken agtutubo ti nakipaset iti operation kugit iti Paoay Central Elementary School.
Segun kenkuana, agtawen ti pito agingga 16 ti balligi a nakugit manipud iti ili ti Paoay, Currimao, iti siudad ti Batac ken ditoy siudad ti Laoag.
Inbatadna a saan a daytoy ti umuna a gundaway nga insayangkatda ti nasao nga aktibidad gapu ta tunggal tawen ket maiwaywayat daytoy malaksid laeng idi napasaran ti pagilian ti pandemia.
Kunana a mangnamnama daytoy nga ad-adu pay dagiti makipaset iti nasao nga aktibidad inton sumaruno a tawen tapno matulongan dagitoy iti libre a kugit.
Innayonna nga adda pay dagiti dadduma nga aktibidad ken programa a sumaruno a maiyuswat kadagiti sumarsaruno a lawas wenno bulan a pakabenepisiaran dagiti naruay nga umili.
