LAOAG CITY – Maysa laeng a bala ti paltog a para iti kalibre 38 ti naala iti pagtaengan ni Bgy. Kagawad Rudy Carriedo iti Bgy. 8 iti ili ti Sarrat iti naisayangkat a search warrant operation ti PNP ti nasao nga ili.
Daytoy ti inbatad ni P/C/Inps. Joseph Baltazar, Hepe ti Pulisya ti nasao nga ili.
Nupay kasta, kuna ni Baltazar nga iti laksid a maysa laeng a bala ti paltog ti naala da ken ibagbaga ti subject ti operasyon nga an-anib daytoy ket ipilaanda latta ti kaso a panagsalungasing iti RA 10591 wenno “Comprehensive Firearams and Ammunition Regulation Act.
Kuna na nga adda ngamin report kadakuada nga adda ilemlemmeng ni Carriedo a maysa nga M 16, maysa a kalibre 45 ken balbala isu nga inwayatan da ti operasyon.
Mainaig iti daytoy, nagyaman ni Carriedo gapu ta awan ti naala da iti ikot na a paltog gapu ta awan met nga agpayso ti paltog na ken napintas ti nagannayasan ti operasyon.
Iti sabali a bangir, awan met ti naala a paltog ngem ketdi dua a bala ti paltog a mapapati a bala para iti caliber 9mm iti naiwayat a search warrant operations iti pagtaengan ni Joselito Pascual, maysa a trisikel driver, ken residente iti Bgy. Bimmanga, Piddig ilocos Norte.
Daytoy ti inbatad ni P/S/Insp. Jeffre Taccad Hepe ti Pulisya ti nasao nga ili.
Segun ken ni Taccad, subject iti nasao nga operasyon ti maysa a kalibre 38 a paltog ken balbala.
Nupay kasta, kuna na a maipilaan latta ti kaso ni Pascual gapu iti panagsalungasing na iti RA 10591.
Immun-unan ngem iti daytoy, nakawat ti PNP-Piddig ti report a ni Pascuaal ket adda iduldulin na a paltog a no dadduma ket ir-irwar na ken pammutbuteng na kadagiti kabarangyanna.
