LAOAG CITY – Inpetteng ni Senate President Sherwin Gatchalian a nasken a saan a makikoordinar ti gobierno kadagiti armado a grupo a rumrummuar a mangprotprotekta ken ni Senador Ronald “Bato” dela Rosa.
Mainaig iti daytoy, binabalaw ti Senador ti rakurak ni Department of the Interior and Local Government (DILG) Secretary Jonvic Remulla a makikokoordinar ti gobierno kadagiti maipagarup nga armado a grupo para iti nakappia a panangarestar ken ni Dela Rosa.
Inbatad ni Gatchalian a saanna nga ammo ti detalye ken ania a grupo daytoy ngem no armado a saan met nga otorisado a maaddaan ti armas ket nasken a saan a makikoordinar kadakuada ti gobierno.
Inpaganetgetna a saan a mabalin nga ad-adda nga armado pay ti maysa a grupo maidaisig iti gobierno.
Kunana a maawatanna ti ibagbaga ni Remulla a panagan-annad laeng daytoy gapu ta biag ti mapagsasaritaan.
Kabayatanna, inpakaammo ni Remulla a makikokoordinar ti gobierno para iti panangarestar ken ni dela Rosa a naudi a na-monitor iti Mindanao.
