LAOAG CITY – Pimmusay ti maysa nga ubing bayat a maag-agasan iti Mariano Marcos Memorial Hospital and Medical Center idiay ciudad ti Batac gapu iti sakit a dengue.
Segun ken ni Mrs. Analisa Abad, Bgy Health Worker iti Bgy. 7-B ditoy ciudad ti Laoag, posible a saan nga iti barangay da iti nakaalaan ti sakit ti ubing nga agtawen ti 8 gapu ta awan ti kaso ti dengue iti barangay da.
Kuna na a mabalin nga idiay Manila ti nakalaan na gapu ta nagbakasyon da itay kallabes ket kalpasan a nagawid da ket bigla a naggurigor daytoy.
Immuna nga intaray da iti Prov’l Hospital ngem kalpasan a na-diagnose a sakit a dengue ti rason a pagguriguran na isu nga insigida nga inyakar da iti Mariano Marcos Memorial Hospital and Medical Center idiay ciudad ti Batac.
Iti agdama, nakamansayag ti bangkay ti ubing pangiyur-urayan iti isasangpet ti ama na a maysa a seaman.
