LAOAG CITY – Birbiruken dagiti otoridad ti maysa a Canadian national gapu ti panangaramid na kas ‘sex slave’ ti agtawen iti 18 a balasang a taga Davao.
Nabigbig ti suspek a ni Dennis Cloutier, agtawen ti 57, taga Canada ken maibilang nga ALIEN National ditoy pagilian.
Inbatad ni Mr. Paulino C. Verzosa, ti mangidadaulo ti Bureau of Immigration and Deportation ditoy probinsiya, irekomendar na iti Secretary of Justice ti pananakaikabil ni Cloutier iti Immigration lookout bulletin tapno saan a makapanaw ditoy pagilyan.
Kuna na nga immuna a nagyanan ti suspek ken biktima ket idiay Davao kalpasan na ket immayda ditoy probinsiya ken ti nakaisalakanan na ket iti paset ti Barangay 15 ditoy ciudad ti Laoag.
Inbatad ni Verzosa a basar iti report, inallilaw ni Cloutier ti biktima ken inpuppupok na iti kuarto nga isu ti pangab-abuswan na.
Innayon na pay a basar ti palawag ti biktima, malaksid kenkuana ket adda pay dagiti immuna a nagbalin a biktima ti suspek idiay Mindanao.
Kabayatan na, kuna ni Verzosa a possible a maibasura ti kaso nga inpila ti biktima gapu ta saanen a mapan agat-atendar ti hearing ngem inpasingked na nga ipursige da ti mangipila ti kaso kontra ti nasao a suspek.
Inpetteng na a kalikagom da nga iserbi paylaeng ti gangannaet ti aniaman a maipataw kenkuana a pannusa sakbay a maideportar.
