Nangiparuk-at ni Presidente Ferdinand “Bongbong” Marcos Jr. ti baro nga Executive Order (EO) No. 130 a nangikeddeng ti baro a pagalagadan iti panangsuspenso ken panangisubli ti face-to-face classes, dagiti aktibidad ti pagadalan, ken on-site work kadagiti publiko ken pribado a pagadalan.
Iti babaen ti baro nga ordinansa, mabalin nga otomatiko nga ipatungpal ti suspension ti face-to-face classes basar iti aktwal a peggad iti kinatalged dagiti estudiante ken empleado, no awan suspension manipud iti nasional a gobierno wenno lokal a gobierno.
Palubusan pay dagiti pagadalan a mangituloy ti face-to-face classes no man pay adda suspension iti bukod a lugar.
Nupay kasta, masapul a masigurado umuna a natalged a sumrek dagiti estudiante ken empleado ken makagun-od ti approval iti local chief executive.
Malaksid iti daytoy, saan a kayat a sawen ti otomatiko a panagsardeng iti panagadal ti suspension ti face-to-face klase. Nadutokan dagiti pagadalan nga agtuloy ti panagadal iti dadduma a wagas no posible.
Inamyendaran pay ti bilin ti Executive Order No. 66, series of 2012 a nangikeddeng dagiti pagalagadan iti suspension ti klase ken trabaho dagiti opisina ti gobierno no adda mapasaran a didigra ken nadakes a panawen.
Maipalagip a kiniddaw ti Department of Education kadagiti lokal a gobierno nga agbalin nga ad-adda a sigurado kadagiti maidekdeklarar ti suspension tapno masalwadan ti oras ti panagadal dagiti estudiante.
