Inbilin ti Office of the Ombudsman ti innem a bulan a preventive suspension nga awan bayadna iti lima a project engineers ti Department of Public Works and Highways (DPWH) Bulacan First District Engineering Office.
Pakairamanan kadagiti suspended engineers da Irene D. Ontingco, Kevin A. Geronimo, John Michael E. Ramos, Bernardo P. Villafuerte ken Michelle C. Cruz gapu iti maipagarup a pannakairaman iti P188.8 million a ghost flood control projects iti Baliuag, Bulacan.
Sangoen dagiti nadakamat dagiti administratibo a kaso ti grave misconduct, serious dishonesty, ken gross neglect of duty mainaig iti tallo a proyekto ti reinforced concrete slope revetment idi 2024.
Rumrumuar iti imbestigasion a maipagarup nga inaramid dagiti engineers ti panangikkat ken panagpeke dagiti dokumento iti inspeksion, panagawat ken panagbayad tapno agpammarang a lehitimo dagiti proyekto.
Inbatad ti Ombudsman a kasapulan ti suspension gapu iti kinapigsa ti ebidensia ken tapno maliklikan ti aniaman a panaggandat a maimpluwensiaan dagiti saksi kabayatan ti imbestigasion.
Saan nga inraman iti order ni dati nga Officer-in-Charge District Engineer Brice Ericson D. Hernandez ken dati nga Assistant District Engineer Jaypee D. Mendoza gapu ta awanen dagitoy iti aktibo a serbisio iti gobierno.
