Nagtestigo iti Sandiganbayan Fifth Division ni dati a Department of Public Works and Highways (DPWH) Secretary Manuel Bonoan mainaig iti petision para iti piansa ni Senador Jinggoy Estrada ita nga aldaw, Oktubre 26.
Iti testimoniana, inbutaktak ni Bonian a maipagarup a nagkiddaw ni Estrada dagiti proyekto nga aggatad ti P1 billion tapno mairaman iti national budget iti babaen ti dati a Department of Public Works and Highways (DPWH) Undersecretary a ni Robert Bernardo.
Segun ken ni Bonoan, insingasing ti kiddaw para iti kanayonan a pondo gapu iti posision ti senador kas Senate President Pro Tempore ken inkonektar pay daytoy iti gastos iti eleksion.
Nupay P1 billion ti kiniddaw a gatad iti babaen ti Senate Leadership Fund, umabot laeng iti P700 million ti opisial a naaprubaran iti General Appropriations Act.
Mainaig iti daytoy, inpaganetget ni Bonoan nga awan rasonna tapno agdua-dua gapu ta nasinged a pagayyemda Estrada ken Bernardo.
Maipalagip a nagserbi a district engineer iti Manila ni Bernardo idi panawen ti panagakem ti ama ni senador a ni dati a Presidente Joseph Estrada kas mayor ti siudad.
Iti agdama, awan pay sungbat ti kampo ti senador kadagiti nagbalin a rakurak ni Bonoan iti sango dagiti mahistrado.
Kabayatanna, mangnamnama daytoy a maipaayan ti gundawa a makapagpiansa tapno makasubli iti trabaho iti Senado.
