Nagkari ni baro a Department of Public Works and Highways (DPWH) Secretary Giovanni Lopez nga ituloy ken papigsaenna dagiti reporma ti ahensia iti tengnga dagiti isyu ti korapsion.
Nadutokan ni Lopez iti Department of Public Works and Highways (DPWH) kalpasan ti kaudian a panagbaliw ti Gabinete. Sinukatanna ni Secretary Vince Dizon a nagsubli iti Department of Transportation (DOTr) kas sektretario.
Segun ken ni Lopez, napateg a mapagtalinaed dagiti reporma uray siasinno man ti agbalin a mangidadaulo wenno sekretario ti ahensia.
Inlawlawagna nga adda dua a paset ti panagbaliw iti maysa nga institution daytoy ket ti panagbaliw iti sistema ken panagbaliw iti kultura ti organisasion.
Gapu ta immunan nga inprioridad ni Dizon ti panagbaliw ti sistema ti Department of Public Works and Highways (DPWH), kuna ni Lopez a kasapulan a papigsaen pay ti panagbaliw iti kultura dagiti opisial ken empleado.
Innayonna pay a kasapulan a maisubli ti talek ti publiko iti babaen ti panangpaimbag iti panag-budget, procurement ken panangipatungpal dagiti proyekto.
Kabayatanna, inbatad ni Dizon a saan a maitantan dagiti reporma kabayatan ti panagsinnukatda ken Lopez iti puesto.
Nupay kasta, nagpudno ni Dizon nga addo pay ti masapul nga aramiden gapu ta saan pay nalpas dagiti reporma iti dakkel nga ahensia.
Malaksid iti daytoy, inpasa ni Dizon ken Lopez dagiti dokumento a naglaon ti nagan dagiti opisial ken empleado ti DPWH a possible a maikkat iti puesto gapu iti maipagarup a pannakairaman kadagiti iregularidad.
