Nagpanawagan ni Senate President Sherwin Gatchalian kadagiti otoridad a siguradoen a natalged ken naurnos ti pannakawayat ti panangarestar wenno panangtiliw ken ni Senador Ronald “Bato” dela Rosa tapno maliklikan ti kinaranggas ken possible a pannakatay dagiti sibilyan ken operatiba.
Inbatad ni Gatchalian a napateg a masigurado ti kinatalged ti kaduana a senador ken dagiti law enforcer a mangiwayat ti operasion gapu ta napeggad ti kastoy a klase ti panangipatungpal ti linteg.
Malaksid iti daytoy, inpaganetgetna a rumbeng nga agbalin a naurnos ti pannakatiliw aglallalo a posible nga agresultar ti kinaranggas kalpasan dagiti inrakurak ti Department of the Interior and Local Government (DILG).
Immunan iti daytoy, inbatad ni Interior Secretary Jonvic Remulla a posible nga umabot iti 10,000 ti matay no puersaen nga arestaren ni dela Rosa.
Gapu iti daytoy, kuna ni Remulla nga agdama a makipagnegosasion wenno makipagsarsarita ti gobierno tapno mallukoy ti senador a sumuko.
Nupay kasta, inpetteng ni Gatchalian a masapul a takderan ti gobierno ti otoridadna iti sango ti report a manipagarup nga adda armado a grupo a mangsalsalakan ken ni dela Rosa.
Immunan nga inrakurak ti Senate President a saan a masapul a makipagnegosasion ti gobierno kadagiti armado a grupo nga awanan ti otorisasion nga agiggem ti armas aglalo no karaman dagitoy kadagiti grupo a kriminal wenno terorista.
Kunana nga arig nakapsot ti impresion ti gobierno no makinegosasion daytoy kadagiti grupo a rumbeng kuma nga adda iti babaen ti linteg.
Nupay kasta, inlawlawag ni Gatchalian a saanna ammo ti intero a detalye mainaig iti grupo a maipagarup a mangisalsalakan ken iti senador. Maawatanna pay no apay saan inbutaktak dagiti otoridad ti sumagmamano nga impormasion gapu kadagiti konsiderasion a pangseguridad.
