LAOAG CITY – Saan pay kinumpirmaran ti Department of the Interior and Local Government wenno DILG nga adda pakainaigan ti maysa a drug syndicate a naka-base iti Davao iti nalappedan a mapapati a P3.5 billion a shabu shipment iti Laos.
Segun ken ni Interior Secretary Jonvic Remulla a nakapukos ti imbestigasion iti panagbigbig kadagiti indibidual ti posible a karaman iti insidente, idinto a nabigbig ti Golden Triangle a naggapuan ti 521 a kilo ti mapapati a shabu.
Binigbig dagiti otoridad ni dati a Bangsamoro parliament member Edrieza Hadji Nasser Rimbang kas suspek ti mapapati a nangpondo iti pannaka-organisar ti pribado nga eroplano a naggandat a mangipatulod ti droga manipud Laos nga agturong ti Manila.
Nupay kasta, saan pay a kinumpirmaran dagiti imbestigador ti posibilad nga adda pay dadduma a personalidad a karamanan iti smuggling operation.
Inlawlawag pay ni Remulla a saan pay a nakupirmaran ti relasion ni dati a Presidente Rodrigo Duterte iti maipagarup nga smuggling operation.
Kabayatanna, agtultuloy ti panangbigbig ti Philippine National Police ken Philippine Drug Enforcement Agency kadagiti indibidual a posible a karaman ken kadagiti transaksion a pinansial, kabayatan maur-uray ti laboratory results manipud iti Laos tapno makumpirmaran ti nakumpiskar a maipagarop a droga.
