LAOAG CITY – Natay dagiti dua a lalaki iti napasamak a desgrasya iti Manila North road, bisinidad iti Brgy. Billoca idiay ciudad iti Batac idi alas-11 ti rabii.
Nabigbig dagiti biktima a da Vyrus Anfernee Labagday y Pascua, agtawen ti 25, residente ti Brgy. 16 Cayubog iti ili ti Paoay, driver ti motorsiklo ken ni Julian Galacgac y Tanawa, adda ti umno a tawen ken residente ti Brgy. Biloca iti nasao a ciudad.
Segun kenni PO2 Laurence Yapit, ti imbestigador ti PNP Batac, bayat a magmagna ni Galacgac nga agawid naggapo iti paggi-inuman ket nadungpar ni Labagay.
Inbatad na a kabayatan met a nakadasay dagiti dua iti kalsada ket sumangad met ti maysa a kotse nga inturong ni Sherylyn Bonifacio . Candiente, agtawen ti 25, maysa a nurse ken residente ti Brgy. 5, San Simon iti ili ti Bacarra.
Inlawlawag ni Yapit, apaman a mapasungadan ni Bonifacio ni Galagac ket liniklikan na daytoy ngem saan na a napakadaan nga ni Labagday rason tapno madungpar na ken naipasirok iti kotse.
Gapu ti daytoy, in-inot a pimmusay dagiti dua a biktima gapu ti pinasar da a nakana sugat iti bagi da.
Agtultuloy met ti imbestigasyon dagiti pulis iti nasao a desgrasya.
