LOAG CITY – Napaltogan ti agpatpataya ti small town lottery babaen ti saan pay a nabigbig a suspek idiay Barangay Fortuna iti ili ti Marcos.
Binigbig ni Police Chief Inspector Jonvale Maramag, chief of police ti PNP-Marcos ti biktima a ni Francisco Rebaola, agtawen ti 48 ken residente iti Barangay Valdez iti nasao nga ili.
Segun kenni Maramag, naggapo ti biktima iti galyera ken idi agawid ket adda ti nanagsaruno kenkuana ken nagkikinnamatan da iti national highway iti nasao a barangay.
Inlawlawag na a kalpasan daytoy ket pinaltogan dagiti suspek ti biktima ken nagsagaba ti siyam a tama ti saan pay a naestablisar a klase ti paltog.
Inbatad na a ti nakapasamakan ti pammaltog ket 50 a metro ti kaadayo na iti ospital isut gapo na a naitaray na ti bukod na a bagi iti nasao a balay pagagasan.
Kunana nga ti inisyal nga imbestigasyon da ket awan ti senyales a mistaken identity ti napasamak.
Nagtalinaed met iti Mariano Marcos Memorial Hospital and Medical Center idiay ciudad ti Batac ti biktima.
Agtultuloy ti imbestigasyon dagiti otoridad seknan iti napasamak tapno mabigbig no siasinno dagiti suspek.
