LAOAG CITY – Nagpangta ni Angelica Joyce Nacino, ti maitudtudo a lider ti P2P Investment Scam a pursigido a mangireklamo kadagiti Area Representatives (ARs) na gapu iti panangimam-mameg da kenkuana.
Segun ken ni Nacino, nangrugi ti operasyon ti P2P idi Hunyo ita a tawen ken ti kadwa na a nangirugi ket ti bestfriend na a ni Monaliza Abad.
Inbatad na nga idi umad-adon ti nagbalin AR da nga umabot ti 44 ket ditoyen nga agkasapulan da ti dakkel a gatad para iti pagsweldo da kadagiti maseknan.
Inpetteng pay ni Nacino a kadagupan dagiti 44 nga AR da ket adda ti agarop 10 a saan nga agiremremit ti makolektar na a kwarta ken no adda man ti iremit da ket saanen a kompleto gapu ta kissayan da.
Kuna na pay a dagiti dadakkel ti nainvest na ket da Nicole Monroy, Mika Sison, Michelle Carmela Navarete, Jenevie Corotan, Lawren Corpuz, ken Angelica Tan.
Inpalgak ni Nacino nga awan pulos ti nabakbakir na saan a kas kadagiti AR na a nakagatang da ti lugan, nakabakir ken nakapabalay da.
Kabayatanna, intudo ni Nacino ni Monroy nga isuna ti nangibaga a pasuksukan da ti Bombo Radyo Laoag tapno maisardengen daytoy nga isyu.
Mainaig iti daytoy, naiget a naglikudan ni Monroy ni Nacino nga isuna ti nangibaga a pasuksukan da ti Bombo Radyo Laoag tapno maisardengen ti isyu ti P2P Investment Scam.
Inpetteng ni Monroy a ti nangibaga iti daytoy ket ni met laeng Nacino.
Inbutaktak na pay nga ado dagiti us-usaren ni Nacino a facebook account na nga isu ti us-usaren na tapno perdien na ti napintas a linnangen da kadagiti pada na nga Area Representatives (ARs).
Inpasingked ni Monroy nga adda dagiti ebidensya na a mangipaneknek a ni Nacino met laeng ti nangibaga a pasuksukan da ti Bombo Radyo.
