LAOAG CITY -Inpetteng ni Sherlyn Baldonado, agtawen ti 36, tubo iti Davao City ken live-in partner ni Adrew Ventura ti natay a subject ti buybust operation a saan na a pulos a nakitkita a nagiwayat ti iligal nga aktibidad ken awan ti paltog na.
Kuna na nga iti maysa a tawen a panagdenna da manipud idi nakarwar iti pagbaludan ti live-in na ket awan ti nakita nga iligal nga aramid na ken saanen nga agsubli iti dati nga aktibidad na.
Inbatad ni Baldonado a nagsuot ti jacket ken short ti nobyo na ngem awan ti ammo na a paltog na.
Innayon na a namarsua laeng iti makaammo iti pudpudno a napasamak iti nobyo na kalpasan iti operasyon dagiti kameng ti PNP Laoag.
Maipalagip a limmaban ni Ventura kalpasan a nakadlaw a pulis ti kinatransaksiyon na iti Brgy. Pila ditoy siudad.
Nupay natamaan na ni Police Master Sgt. Lawrence Ganir babaen ti panangpaltog na usar ti kalibre 45 a paltog ket bimmales daytoy iti namitlo a putok rason iti nakatayan ti suspek.
Immunan a narekobre dagiti otoridad ti innem a sachet a naglaon ti maipagarup a shabu, 1,000 peso bill a marked money ken dadduma pay.
