LAOAG CITY – Inbatad ti World Health Organization nga umab-abot iti 112 ribo a Pilipino ti matmatay iti kada tawen gapu kadagiti sakit nga adda ti pakainaigan ti tabako wenno sigarilyo.
Naduktalan nga innem iti kada 10 a Pilipino nga agtawen ti 13 agingga iti 15 ket na-exposed iti secondhand cigarette smoke iti ruwar ken dagiti pampubliko a lugar.
Daytoy ket mangpangato iti pakaseknan iti health ken child rights advocates maipanggep iti epekto ti panagsigarilyo dagiti agtutubo.
Iti datos manipod iti 2024 Global Youth Tobacco Survey, a naiparuk-at iti civil society organizations idi Setyembre, makita ditoy nga uppat iti kada 10 nga estudyante iti kapada nga age group ket na-exposed ti secondhand smoke iti uneg ti pagtaengan da.
Ti Secondhand smoke ket isu ti asok a maiparparuk-at manipod kadagiti agsigsigarilyo no sadinno a dagiti makalang-ab iti daytoy ket mabalin a mairisgo ti salun-at da uray saan nga isuda a mismo ti agsigarilyo.
