LAOAG CITY – Nangiparuk-at ti baro a guidelines ti World Health Organization (WHO) tapno gutigoten dagiti pagilian nga umakar manipud iti pannakaibalud kadagiti ospital iti psychiatric a mapan iti adadda a makatao ken nakatutok iti komunidad a serbisio iti mental health.
Inpetteng ni World Health Organization Director-General Dr. Tedros Adhanom Ghebreyesus a saan a masapol nga isakripisio dagiti pasiente ti kinawaya ken karbenganda para laeng makaawat ti kasapolan a suporta a medical.
Gapu iti daytoy, ti naiparuk-at a baro a guidelines ket dagiti praktikal a panagtignay para kadagiti mangidadaulo dagiti pasilidad tapno makissayan ti nabayag a proseso ti confinement ken matulungan dagiti pasiente babaen ti panangipaay kadakuada ti pabalay, trabaho ken suporta iti pamilia.
Kabayatanna, nagpanawagan ti WHO kadagiti gobierno iti nagduduma a pagilian iti intero a lubong a paalistuen ti panangilatangda ti pondo kadagiti lokal a programa para iti salun-at.
