LAOAG CITY – Sumango ni Francisco Saclamitao Jr, residente iti Brgy. Sta. Rita iti ili ti Paoay ti kaso a murder ken iti panagsalungasing iti RA 10591 kalpasan ti panangpaltog na iti biktima a ni Eduardo Honor a taga Brgy. Magnuang iti siudad ti Batac.
Immuna iti daytoy, pimmusay ni Honor bayat a maag-agasan iti Mariano Marcos Memorial Hospital and Medical Center iti nasao a siudad gapu ti tama ti bala iti ulo na.
Segun kenni Police Major Artemio Clemente, hepe ti PNP Batac, inuray da ti death certificate ti biktima para iti pannakaipila dagiti kaso kontra kenni Saclamitao babaen ti inquest proceeding.
Mainaig iti daytoy, kuna ni Clemente nga adda dagiti timmaod nga impormasyon a maipagarup nga adda ti grupo ti suspek a pamappapatay.
Inbatad na a kurang pay dagiti ebidensya seknan iti panabigbigan ti suspek.
Iyur-uray da pay ti resulta ti firearm verification ken iti pannakaidalan ti narekobre a kalibre 45 a paltog, kapsula ken bala iti ballistic examination.
Possible a manayunan pay ti kaso ti suspek no maiparuk-at ti resulta dagiti eksaminasyon.
