LAOAG CITY – Inadmitir ti saanen a nagpabigbig a barangay tanod nga adda dagiti narespondian da a menor de edad a kumarit wenno imingar no maanawa da.
Daytoy ket mainaig iti nagbalin a topiko iti Bombo Hanay Bigtime a pannakatiliw dagiti menor de edad a nagbakal ti pampasahero a bus a Gabriel Trans iti Brgy. 4 Poblacion iti ili ti Pasuquin.
Segun ti barangay tanod, agbuteng da kadagiti menor de edad nangruna no rason nga agannad da kadakuada.
Innayon na nga awan ti mabalinan da tapno saan da a madangran dagitoy.
Maipalagip a natiliw dagiti lima a tattao a pakaibilangan dagiti uppat a menor de edad, ken maysa nga adda iti legal nga edad iti ili ti Pasuquin kalpasan a binakal da ti pampasahero a bus.
Immunan a ti palawag dagiti maseknan ket pinagtripan da ti bus bayat nga adda da iti impluwensya ti nasanger.
