LAOAG CITY – Maag-agasan pay laeng ti senior citizen iti Mariano Marcos Memorial Hospital and Medical Center iti siudad ti Batac kalpasan a natukkol ti saka na gapu ti desgrasya iti Brgy. San Marcelino iti ili ti Dingras idi kalman.
Nabigbig ti biktima a ni Porferio Manuel y Reymundo, agtawen ti 63, naasawaan mannalon ken residente iti Brgy. Puttao iti ili ti Solsona.
Immuna iti daytoy, bayat nga agpapaamianan a direksiyon ti kurong-kurong nga inturong ni Roger Ferrer, agtawen ti 37, ken nakalugan ti agtawen ti 15 a lalaki ket maipagarup nga adda ti natukkol iti nagbaetan ti nasao a lugan.
Daytoy ti rason a naawanan ti kontrol ni Ferrer ken nadungpar na ti biktima.
Gapu iti daytoy, natukkol ti akin kannawan a saka ni Manuel ken dagus a naitaray iti Dingras Distrcit Hospital ngem naiyakar iti MMMHMC iti nasao a siudad para iti naan-anay a pannakapaagas na.
Agtultuloy ti imbestigasyon dagiti otoridad seknan iti nasao a desgrasya.
