LAOAG CITY – Nagsagaba ti sugat dagiti tallo a nakalugan ti motorsiklo a pakairamanan ti maysa a menor de edad kalpasan a nasapgud ida ti maysa nga Hyundai Starex iti national highway bisinidad ti Brgy 16, San Marcos iti ili ti San Nicolas.
Nabigbig ti nangiturong ti motorsiklo a ni Samuel Cimatu y Fernandez, agtawen ti 50, idinto a dagiti inlubbon na ket da Lina Cimatu y Aspili, 55 ken ti agtawen ti 12 a menor de edad, agpapada dagitoy a residente iti Brgy 51A Nangalisan ditoy ciudad ti Laoag.
Iti imbestigasyon, kabayatan ti panagpapa-abagatan a direksyon dagiti dua a lugan ket nag-overtake ti motorsiklo iti Hyundai Starex a nangitunda ti insidente.
Gapu iti napasamak ket natulid ti motorsiklo a nakasugsugatan dagiti nakalugan idinto a ti Hyundai Starex ket intultuloy na ti nagpataray nga immadayo iti lugar.
Naitaray dagiti biktima iti Governor Roque Ablan Sr. Memorial Hospital ditoy siudad ti Laoag para iti naan-anay a pannakataming da.
Iti agdama, naiget ti imbestigasyon dagiti otoridad tapno mabigbig ti kinatao ti nangiturong ti Hyundai Starex.
