LAOAG CITY – Manamnama nga intono Huwebes, Mayo 13 ket maipan iti babaen ti General Community Quarantine (GCQ) ti sibubukel a ciudad ti Laoag.
Daytoy ti inrakurak a mismo ni Mayor Michael Marcos Keon kabayatan ti press conference na itay ummuna a gundaway.
Segun kenni Mayor Keon, daytoy ket gapo ta adda ti nasurok 150 nga aktibo a kaso ti covid-19 manipud kadagiti 44 a barangay.
Inbatad na a manipud iti nasao a bilang ket adda ti 10 a kaso a naggapo iti merkado publiko ditoy ciudad ti Laoag kalpasan nga 805 nga aglaklako ti dimmalan iti swab test.
Nupay kasta, apaman nga addan iti babaen ti GCQ ti ciudad ket mapalubusan latta dagiti aglaklako nga aglako iti nagduduma a lugar no laketdi dagitoy ket negatibo iti covid-19.
Maysa pay kadagiti manamnama a maisayangkat ket ti pannakaestablisar ti barangay checkpoint kadagiti addaan ti kaso ti covid-19, idinto a dagiti APOR a residente iti ruwar ti ciudad ket mapalubusan latta a sumrek.
Naamoan a posible nga agpaot ti dua a lawas ti GCQ ditoy ciudad ken maiyur-uray pay laeng ti executive order ni Governor Matthew Marcos Manotoc.
Mainaig iti daytoy, isagsagana metten ti lokal a gobierno ipaay na a tulong kadagiti maapektaran a residente.
