LAOAG CITY – Inbatad ni Atty. Rosemarie Ramos, ti dati a judge iti RTC Branch 19 iti ili ti Bangui a dakkel ti epekto na iti kina-huwes na ken ti ayan na a korte dagiti alegasyon kenkuana idi ni Vice Mayor Vincentito Lazo ditoy ciudad ti Laoag.
Daytoy ket mainaig iti maipagarop a panagpabayad ni Ramos ti dakkel a kantidad manipod kadagiti natiliw a chinese a nagikot kadagiti agkangkangato ti kalibre na a paltog.
Kuna ni Ramos a gapu iti alegasyon kenkuana ni Lazo idi daytoy ket kameng pay laeng ti Sang Panlalawigan ket naparnuay iti panunot ti publiko no kabaelan na pay laeng ti mangipaay iti patas a pannakatratar dagiti kaso a maidatag iti sala na.
Inlawlawag na nga amin nga abogado ket maibilang nga officer of the court ken responsibilidad amin nga abogado a mangrespetar ti korte.
Inpetteng na a no adda ti saan a kayat wenno panagdudua ti abogado mainaig iti aksyon ti huwes ket adda ti umno a lugar wenno wagas a mangipeksa ti reklamo.
Nupay kasta, kuna ni Ramos nga inpeksa ni Lazo ti arungaing na iti mismo nga junta probinsyal babaen ti panag-privilege speech na no sadinno a maipagarop a saanda pay nga inikkan ti gundaway tapno madependaran na met ti bagina.
Mainaig iti daytoy, nagyaman ken respetaren ni Ramos ti nagbalin a desisyon ti korte suprema iti inpila na a reklamo kontra ken ni Lazo.
Immun-una iti daytoy, sinuspenso ti korte suprema ni Lazo kas maysa nga abogado iti makatawen gapu iti kaso nga inpila kontra kenkuana ni Ramos.
