LAOAG CITY – Inlawlawag ni PCpl. Mike Briones iti traffic division ditoy siudad ti Laoag ti napasamak a degrasya iti bypass road, bisinidad ti Brgy. Sta. Maria ditoy siudad.
Inbatad ni Briones a basar iti naiyuswat nga imbestigasyon, agpada nga agpapaabagatan a direksyon ti maysa a pick-up nga inturong ti maysa a residente iti ili ti Bacarra ken ti motorsiklo nga inturong ti taga Brgy. Billoca iti ili siudad ti Batac.
Kuna na a bayat a daldalyasaten dagiti dua a behikulo ti nadakamat a kalsada ket ginandat ti motorsiko nga ag-overtake iti maysa a kurong kurong a sasarunuenda ngem saan a nagballigi.
Gapu iti daytoy nagderderetso ti motorsiklo ken naidungpar iti likudan ti pick-up.
Naibbatan ti driver ti manibela ti motorsiklo ken naipurwak rason a nagsaba ti sugat iti ima ken saka na.
Kabayatanna, kuna ni Briones a nakapagsaritan dagiti agsinnumbangir a partido mainaig iti nasao nga insidente.
