LAOAG CITY – Agtultuloy ti imbestigasyon ti Bureau of Fire Protection (BFP) mainaig iti napasamak nga uram iti Barangay 28 ditoy ciudad ti Laoag.
Daytoy ti inbatad ni Fire Senior Inspector Ronald Castillo, ti firemarshall ditoy ciudad.
Segun ken ni Castillo, agpapan ita ket awan pay ti Persons of interest da iti pannakauram ti maysa a van a nakaparkeng iti maysa a pagtaengan iti nadakamat a barangay.
Inlawlawag na nga adda dagiti dinakamat ti caretaker iti balay nga agtagikua iti van a possible a nangpuur iti lugan ngem masapol nga adda ti pammaneknek da.
Immuna iti daytoy, basar iti CCTV footage a naala ti Bombo Radyo Laoag iti BFP-Laoag, sakbay ti pannakauram ti van ket nakita nga adda ti naglubbon iti motorsiklo a nagsardeng iti ruwar ti balay no sadinno a bimmaba pay dagiti nakalugan a napan iti gate.
Nupay kasta, saanda a nalukatan ti gate isut gapuna a nagpadaya da ken kalpasan laeng ti sumagmamano a minutos ket napuuranen ti nasao a lugan.
