LAOAG CITY – “Pray. Read. Repeat.”
Daytoy ti estratehiya ni Mr. Daniel Joshua Sarabia iti Barangay 12 ditoy ciudad ti Laoag iti panagbalin na a Top 9 iti December 2021 Criminologist Licensure Examination.
Segun kenni Sarabia, naamoan na ti resulta babaen iti kabsat na gapo ta idi kalman a rimuar ti resulta ti eksaminasyon ken inranta na nga in-off ti cellphone na gapo iti nerbyos na amangan no saan na makita ti nagan na kadagiti nakapasa.
Nupay kasta, nabang-aran ken napalaos ti ragsak na iti dakkel a balligi na iti laksid dagiti karit a sinango na bayat ti panagadal agingga a nageksamin.
Inbatad na a karaman kadagiti karit a sinangi na sakba a nakapasa ket ti covid-19 gapo ta namitlo a daras a naitantan ti eksaminasyon pakairamanen ti financial capabilities.
Kunana a babaen iti suporta ti pamilya na ket nalabanan na amin dagitoy ken nagballigi.
Mainaig iti daytoy, kunana nga idi ubing ket saan na nga inarapaap ti agbalin a pulis ngem idi nagturpos iti sekondarya ket nagdesisyon a mangala ti kurso a Criminology gapo iti personal a rason.
Inyistorya pay ni Mr. Sarabia nga idi nakaenroll iti kurso a Criminology isu met ti pannakatiliw ti ama na nga isu ti nangitunda ti pannakapaay na iti sitwasyon na.
Tawen 2017 idi nagsardeng ken idi na-acquit ti ama na idi 2019 ket intuloy na ti kurso na idi Northwestern University (NWU) ken idi Agosto 2020 a nagturpos.
Naamoan nga ita a nakapasa iti eksaminasyon ket kalikagom na nga agexplore iti nagduduma nga oportunidad ken ti posibilidad
Kabayatanna, kuna ni Mr. Sarabia a ni Mrs. Angelita Sarabia nga inted na amin ti suporta na ken ibilang na nga “answered prayer” ti balligi ti anak na.
Dinakamat na nga arig na saan pay a mamati ngem gapo iti panagtalek na iti anak na ken suporta nga inpaay da a nagannak kenkuana ket nakapasa ken nagbalin pay a Top 9 iti eksaminasyon.
