LAOAG CITY – Inadmitir ni Mrs. Perlita Cabello, ti mangidadaulo ti City Social Welfare and Development Office (CSWDO) ditoy ciudad ti Laoag nga adda ti panagngato ti boses na idi adda ti nagsaludsod kenkuana.
Sungbat daytoy ni Cabello iti reklamo a naawat ti Bombo Radyo kontra kenkuana a maipagarop a madi a panagsungbat na kadagiti benipisyaryo a nagsaludsod kenkuana.
Daytoy ket kabayatan ti pay-out iti AICS para iti financial assistance manipud iti DSWD iti koordinasyon ti gobierno probinsyal.
Segun kenni Cabello, saan a maliklikan nga adda ti panagngato ti boses na nangruna no kanayon ken isu laeng nga isu ti damdagen ti maysa a tao.
Inlawlawag na nga ummunan a naibaga a sumurot dagiti benipisyaryo iti pila ngem rumrumuar a saan da a makauray ken idi adda ti inawagan ti social worker ket naggigiddan da a nagpasango.
Kunana a daytoy ket iti laksid nga ummunan a naibaga a dagiti taga DSWD ti mangiyawat ti kwarta kadagitoy ken saan laeng nga isuna ti nagsaludsudan dagiti maseknan.
Mainaig iti daytoy, nagpadespensar met ni Cabello iti madi a panangipapan iti naibaga na.
