LAOAG CITY – Desidido nga agpila ni Sang. Bayan. Member Charles Lazo iti ili ti Currimao ti reklamo kontra kenni Sang. Bayan Member Isabelo “Belong” Aglipay a maipagarop a nangdanog kenkuana.
Segun ken Lazo, idalan na iti legal a proseso ti inaramid kenkuana ni Aglipay.
Inlawlawag ni Lazo a saan na nga ammo ti rason no apay a dinanog isuna ni Aglipay nangruna ket awan met ti malagip na a nagriryan da.
Kunana a kas maysa a konsehal, gagangay laeng nga adda ti pagdedebatean da iti konseho mainaig iti nagduduma a banag.
Ummuna iti daytoy, inbatad ni Lazo nga idi masabat na ti lugan ni Aglipay ket maipagarop a nagsao daytoy ti dakes ken dinamag na laeng ni siasinno ti pagsawsaw-an na.
Nupay kasta, maipagarop a bimmaba ni Aglipay ken dinanog na lattan ni Lazo.
Kabayatanna, inpetteng ni Sang. Bayan Member Isabelo “Belong” Aglipay a saan na a dinanog ni Konsehal Charles Lazo no diket induron na laeng.Segun kenkuana, daytoy ket gapo ta bayat a masabat da ni Lazo ket maipagarop nga agbirbirok ti napangas daytoy ken adda ti nabayagen a madi a rikna na iti daytoy.
Kunana a namunangay ti sakit ti nakem na kenni Lazo kalpasan a naamoan ni Aglipay manipud kadagiti kumpadre na nga opisyales ti Pinili a maipagarop nga inbatad ni Lazo a traydor isuna, addan ti dua a bulan ti napalabas.
Inbatad na a mabalin a ti rason a nadakamat ni Lazo a traydor isuna kalpasan nga immakar ken napan iti partido ti agdama a mayor.
Kumbinsido met ni Aglipay nga isuna ti dakdakamaten ni Lazo a “pangas” ken mabalin nga adda ti maris pulitika daytoy.
Inpalgak na nga ar-aramid laeng nga istorya a nagsao isuna ti dakes.
Mainaig iti daytoy, inlawlawag na nga arig na napunoan iti naidanon kenkuana ti balikas ni Lazo a maipagarop a traydor isuna ken ti panagbirok ti napangas.
Nupay kasta, kunana a kas maysa a konsehal ket dumawat ti panagpadespensar nangruna ket naimatangan ti mayor ti pasamak.
Inbatad na nga awaten na no anyaman ti sumaruno nga addang ti Lazo.
