LAOAG CITY – Natay ti maysa a lalaki kalpasan ti panagdinnungpar ti motorsiklo ken kurong-kurong iti Barangay Saud iti ili ti Pagudpud.
Segun ken ni Police Major Jomar Andres, ti chief of police ti PNP-Pagudpud, ti biktima ket maysa a construction workers, naasawaan ken residente iti Barangay Burayoc iti nasao nga ili.
Inlawlawag ni Andres a bayat nga agpaamyanan ti biktima ket nasabat na ti agpaabagatan a kurong-kurong nga inturong ti agtawen ti 39 a construction worker, naasawaan ken residente iti Brgy. Caparispisan iti nasao met laeng nga ili a nangitunda ti panagdinnungpar da.
Gapo iti daytoy, naipisok ti driver ti motorsiklo iti kurong-kurong a nangitunda ti panagsagaba dagitoy ti sugat iti nagduduma a paset ti bagi da ken iti ulo da, ken dagus met a naitaray iti ospital
Nupay kasta, naideklara a dead on arrival ti driver ti motorsiklo idinto nga agtultuloy a maag-agasan ti driver ti kurong-kurong.
Agpapan maisursurat ti damag ket saan pay a maestablisar ti PNP no siasinno ti dimmungpar ken no nakainom ti nasanger dagitoy.
Kabayatanna, agtultuloy ti imbestigasyon ti dagiti otoridad seknan iti nasao nga insidente.
