LAOAG CITY – Kinarit ni Vice Mayor Vicentito Lazo ni dati a Mayor Roger Fariñas nga agsango da a dua, saan ket a ti babai ti dangran na partikular iti asawa ti kandidato iti kina-konsehal Bryan Alcid.
Segun kenni Lazo, manarimaan ti house-to-house campaign da iti Barangat Barit ditoy ciudad ti Laoag idi nakaawat ti tawag manipud kenni Alcid nga agpatpatulong.
Daytoy ket gapo ta maipagarop a pinilit ni Fariñas ti simrek iti compound da ti Alcid ken dinangran na ti asawa ti kandidato, pakairamanan ti gwardya ken supporters ti team Marcos.
Gapo iti daytoy, insardeng da ti panagkampanya da ken mapan da iti lugar ni Alcid ngem bayat nga adda da iti dalan ket nakaawat ti tawag a maipagarop a timmarayen ni Fariñas.
Inpetteng na nga idi nakita da ti lugan ni Fariñas ket sinurot da daytoy agingga a nakadanon da iti Barangay Mangato-B.
Inpalgak na nga ur-urayen da dagiti otoridad tapno dagitoy ti mangaramid ti addang gapo ta rumrumuar nga intarayan ni Fariñas ti madi nga inaramid na.
Kunana nga idi immasideg ni Fariñas iti lugan da ken kinomprontar na ni Lazo agingga a nagsinnungbat da ken inbaga na iti dati a mayor a saan a rumbeng nga itarayan na ti inaramid na.
Inlawlawag na a nakastrek ni Fariñas iti compound gapo ta kinugta-kugtaran na daytoy ken maipagarop nga adda pay ti dinangran na.
Mainaig iti daytoy, patien ni Lazo nga adda ti amak ni Fariñas gapo ta ado ti supporters ti grupo da isut gapo na nga adda dagiti agtaod nga isyu seknan iti vote buying.
Kabayatanna, kuna ni Alcid a manarimaan ti panaghouse-to-house da ket timmawag ti asawa na tapno ipakammo nga adda ni Fariñas iti bodega da isut gapo na a nagpatulong kenni Lazo.
Kunana a basar iti gwardya, nakastrek ni Fariñas iti bodega gapo ta kinugtaran na ti ridaw.
Inbatad na a malaksid iti daytoy, maipagarop a naiduron ken nabekkel ti ti asawa na isut gapo na a nagsagana ti sugat.
Malaksid iti daytoy, kunana pay nga uray ti gwardya ket maipagarop a nadanog ken napangtaan ken rumrumuar a nadangran pay ti maysa a supporter.
Desidido met ni Alcid a mangipila ti reklamo kontra kenni Fariñas.
