LAOAG CITY – Pinalagipan ni Atty. Joel Gines, ti Provincial Election Supervisor dagiti nagkandidato iti eleksyon 2022 iti obligasyon da a pannakaipila ti Statement of Contribution and Expenditure (SOCE).
Segun kenni Gines, mangrugi dan nga agawat iti SOCE dagiti amin a nagkandidato, saan laeng a dagiti nangabak.
Inlawlawag na a kadagiti met nangabak ket masapol nga aggisubmitir da iti SOCE sakbay nga agtugaw da iti pwesto.
Inbatad na nga uray nag-withdraw sakbay ti eleksyon wenno nagsanod kalpasan ti kampanya ket agpila latta ti SOCE.
Kadagiti met agpila ti SOCE babaen iti representative, kuna ni Gines a masapol a written ken addaan ti notarisasyon wenno babaen iti SPA.
Innayon na a ti panagngudo ti panagiubmitir ti SOCE ket intono Hunyo 8.
Kabayatanna, inbatad ni Gines a no matuloy ti Barangay Election intono Disyembre ita a tawen, addan to ti maiyuswat a general registration.
Gapo iti daytoy, binalakadan na saan pay a naka-rehistro wenno na-deactivate ti status da a gundaway da ti maiyuswat a panagparehistro da.
Kunana nga iti biang ti Comelec ket agsagana da latta para iti Barangay Election ngem gapo ta addan ti pannakaitantan daytoy ket agdepende iti kongreso no maituloy wenno saan ti eleksyon.
