LAOAG CITY – Balligi ti pannakatiliw ti maysa a lalaki iti naisayangkat a drug buy-bust operation iti Brgy. 2, Sta Juaquina ditoy ciudad ti Laoag.
Nabigbig ti natiliw a ni Janus Rafael Andres y Sor, agtawen ti 21, awanan ti asawa ken residente iti Brgy. 27 ditoy ciudad, ken maibilang a Street Level Individual iti PNP-Laoag.
Ti operasyon ket naiyuswat babaen iti nagtitipon a pwersa ti Laoag City Police Station DEU kas lead unit, PIU-INPPO, PDEU INPPO, RPDEU1, CIDG Ilocos Norte, RID PRO1 ken PDEA-INPO.
Naamoan a nakagatang ti police poseur-buyer iti suspek ti maysa a sachet a naglaon ti maipagarop a napagango a bulong ti marijuana iti balor a 500 a pisos.
Nakumpiskar pay manipud kenni Andres ti maysa a nangisit nga sling bag a naglaon ti maysa a coin purse a nakaipanan ti vaccination card na; dua a condom; cash a. 1,300 a pisos iti nagduduma a denominasyon; maysa a sachet a naglaon met laeng ti maipagarop a napagango a bulong ti marijuana; cellphone, lighter, motorsiklo ken dadduma pay a personal a kagamitan na.
Kabayatanna, mapatta-patta nga agdagsen ti nakumspikar a maatap a droga iti 6.5 grams.
Iti agdama, maisagsaganan ti kaso a panaglabsing iti RA 9165 a maipila kontra kenni Andres.
