LAOAG CITY – Balligi ti pannakatiliw dagiti aglive-in partner iti naisayangkat a search warrant operation iti Barangay 19 iti Ili ti San Nicolas.
Nabigbig dagiti subject nga isuda Arnold Ragutero, maysa a welder ken ni Cely Gonzales alyas Camille, tubo iti Leyte ken agkaskasera iti Sitio 4 iti nadakamat a barangay.
Nasukimat dagiti otoridad iti kwarto dagiti aglive-in partner ti 19 sachet a naglaon ti maipagarop a shabu, maysa a residue, maysa a glass tube tooter, malaksid laeng iti ikot ni Ragutero a maysa a glass tube tooter.
Malaksid iti daytoy, nasukimat pay iti kusina ti maatap met laeng a shabu, drug paraphernalia ken dadduma pay.
Amin dagiti nakumpiskar a maipagarop nga iligal a droga ket agdagsen ti agarop 20 a gramo
Iti pannakisarita ti Bombo Radyo Laoag kenni Ragutero, inadmitir na nga iti laeng napalpalabas nga aldaw ti naudi a panagusar na ti iligal a droga.
Kuna met ti kabsat ni Gonzales a ni Roxanne Gonzales a saan na nga ammo a kastoy ti aramid ni Cely ken awan met ti nadlaw na sipud kaadda daytoy na iti kasera da nangrugi idi Domingo.
Rumrumuar a dagiti suspek ket karaman iti Top 10 Drug Watchlist ti PNP Region 1 ken miembro da iti drug group nga agop-operar ditoy probinsya.
Naamoan a nasurok makabulan a nasipsiputan dagiti suspek.
Mainaig iti daytoy, inbatad ni Barangay Kagawad Rodgerly Vicente a nakigtot da iti pannakakumpiskar ti maipagarop a shabu kadagiti aglive-in partner.
Inpetteng na a saan da nga ipalubos nga addan to manen ti kastoy a mapasamak iti uneg ti barangay da isut gapo na nga igetan da pay ti panagmonitor da.
Iti agdama, maisagsaganan ti kasao a maipila a kaso a panaglabsing iti RA 9165 a maipila kadagiti aglive-in partner bayat ti panagtalinaed da iti kustudiyar ti PNP-San Nicolas.
