LAOAG CITY – Inpasigurado ni Engr. Jonathan Corpuz, manager ti National Food Authority (NFA) ditoy probinsya nga adda ti
makaanay a suplay ti bagas a para iti panawen ti panagtutudo.
Segun kenni Corpuz, iti agdama ket adda ti stock a nasurok 15 a ribo a bags ti bagas ken nasurok 26 a ribo a bags ti irik ti nasao nga ahensya.
Inlawlawag na a ti nasao a buffer stock ket makaanay agingga iti maikadua a lawas ti bulan ti Oktubre ita a tawen nga isu metten ti panawen ti panagga-apit ditoy probinsya.
Inbatad na a dagiti stocks manipud pay idi Enero 2021 ket local rice wenno naggapo amin kadagiti lokal a mannalon ken magatang a produkto dagiti kaprobinsyaan.
Kunana nga iti agdama ket awan ti imported rice nga stock ti NFA sipud pay idi Enero 2021.
Dinakamat ni Corpuz nga idi tawen 2021, nakagatang ti NFA 39,500 a bags nga irik kadagiti local a mannalon ditoy Ilocos Norte; agarop 145 a ribo a bags met nagatang da iti Ilocos Sur ken 27 a ribo a bags met manipud iti Abra.
Mainaig iti daytoy, kunana a nagtalinaed met a 25 a pisos ti kada kilo ti presyo ti NFA rice, idinto a ti 19 a pisos met iti kada kilo met ti nabilag nga irik.
Kabayatanna, patyen ni Corpuz a ti 25 a pisos a kada kilo ti NFA rice ket saan nga umanay ngem adda met ti subsidy nga it-ited ti gobierno iti ahensya rason nga isu ti inkeddeng da a presyo.
