LAOAG CITY – Inpakammo ni Police Lt. Christopher Pola, ti chief of police ti PNP-Bangui nga awan met ti nakaro a sinagaba ti driver ti tanker a naregreg iti derraas iti Viewdeck iti paset ti Brgy. Baruyen, Bangui, Ilocos Norte.
Nabigbig ti driver ti tanker a ni Mark David Aguillon, agtawen ti 31 ken residente iti Barangay Billoca iti ciudad ti Batac.
Segun kenni Pola, ti tanker ket naggapo iti ili ti Cabugao iti probinsya ti Ilocos Sur ken nagkarga ti krudo ken gasolina ken ideliver na kuma iti ili ti Pagudpud.
Inbatad na nga idi nakadanon iti viewdeck ken napukawan ti preno ti tanker a rason ti pannakaidungpar na iti bunton agingga a naregreg iti derraas.
Iti agdama, adda metten iti nasayaat a kondisyon ti driver gapo ta gasgas laeng ti sinagaba na.
Mainaig iti daytoy, naamoan a ti nakapasamakan ti insidente ket maibilang nga accident prone area.
Kabayatanna, kuna ni Pola a naiyakar met ti karga a gasolina ti tanker sakbay ti panangiyaon da iti mismo a behikulo.
