LAOAG CITY – Saan a makumpirmaran ni Mayor Joseph de Lara iti ili ti Solsona no adda ti pannakinaig na iti eleksyon ti pannakapalto-paltog ti maysa a tricycle driver iti Sitio Corcuera, Brgy. Laureta iti nasao nga ili.
Segun kenni De Lara, awan met ti nakariri dagiti coordinators da rason a saan na a maibaga no konektado iti eleksyon.
Inlawlawag na a saan nga agsardeng ti kapulisan nga agimbestigar iti pammaltog ken rumuar to met laeng no anya ti pudno a rason ken maipaay ti hustisya iti pannakatay ti biktima.
Mainaig iti daytoy, kunana a nakasarita na a mismo ti indibidual a nakakita iti insidente no sadinno a kalpasan a pintlogan ti suspek ti biktima ken natulid ken maipagarop nga inpan na iti kali.
Malaksid iti daytoy, kunana a basar pay iti nakakita, sinurot pay laeng ti suspek ti biktima iti kali ken ditoy a maipagarop a tinuluyan na a pinalto-paltogan.
Patyen pay ni De Lara a mabalin a saan a taga sabali a lugar ti suspek nangruna ket ammo na ti nagtarayan na kalpasan ti panangbukgaw ti maysa nga indibidual a nakakita.
Kunana a basar iti impormasyon kenkuana, rumrumuar ina inarkila a mismo ti suspek ti biktima ken naglugan daytoy iti mismo a terminal daytoy.
Mainaig iti daytoy, kuna na nga adda metten ti pamalpalatpatan ti PNP-Solsona iti posible nga akin-aramid daytoy.
Inbatad na pay nga ireview da dagiti CCTV iti sentro ti ciudad ken amin a wagas ket aramiden ti kapulisan tapno mabigbig ken matiliw ti suspek.
Kabayatanna, binalakadan ni De Lara ti suspek a sumuko laengen kadagiti otoridad.
Iti agdama, manarimaan pay laeng ti naun-uneg nga imbestigasyon dagiti otoridad seknan iti pammaltog.
Maipalagip nga idi kalman ket pinalto-paltogan ti saan pay a nabigbig a suspek ti biktima a ni Renato Ignacio a taga Barangay Catangraran iti nadakamat met laeng nga ili.
Basar iti inisyal nga imbestigasyon dagiti otoridad, nagsagaba ti biktima iti sumagmamano a tama ti bala ti paltog iti nagduduma a paset ti bagi daytoy partikular iti ulo ken buksit.
