LAOAG CITY – Inbatad ni Vice Mayor Jonathan de Lara iti ili ti Solsona a nangrugi idi biernes ket naiyestablisar ti checkpoint kadagiti entry ken exit points iti nasao nga ili.
Daytoy ket kas paset iti panagannad kontra iti ASF kalpasan nga adda dagti naduktalan a kaso ditoy probinsya.
Segun ken ni de Lara, naiget a maipawil ti panagiserrek ken panagiruar ti baboy ken ti karne daytoy iti ili ti Solsona.
Inlawlawag na nga agtultuloy a maiparit ti immunan a pagannurutan seknan iti panagparti ti baboy nu sadino a masapol nga iti amin slaughter house ti masapol a pagpartian kadagitoy.
Innayun na nga uray dagiti agpautang wenno agpauraga ti karne ti baboy ket temporaryo pay laeng a maipawil agraman ti panagilako iti online.
Immunan a nadakamat ti bise mayor a sipud pay idi simrek ti ASF iti ili ti Solsona ket apektado ti suplay ti karne ti baboy iti nasao nga ili.
Kabayatanna, dimmawat ti pannakaikoordinar ti bise mayor manipod iti publiko tapno maliklikan ti panagwaras ti ASF.
Maipalagip nga iti ili ti Solsona ti maysa kadagiti kangrunaan a naapektaran ti ASF idi immuna nga adda ti surge ti nasao a virus.
