LAOAG CITY – Maragsakan dagiti amin a miembro ti Tadero Association iti intero a probinsya kalpasan a nailungalong ti panaglukat manen ti galyeraan ditoy ciudad ti Laoag.
Daytoy ti inbatad ni Mr. Frigidio Lorenzo Jr. Pres. Tadero Association ditoy probinsya.
Inlawlawag ni Lorenzo nga idi nangngeg na ditoy Bombo Radyo Laoag ti inrakurak ni Konsehal Jason Perera nga ilungalong na ti panaglukaten ti galyeraan ditoy ciudad ket napalalo ti ragsak na no sadinno a kinataripnong na amin dagiti miembro na.
Inpakaammo na a no malukatan manen ti galyeraan ditoy ciudad ket dakkel a tulong kadakuada.
Kabayatanna, uray ni Mr. Edgar Lao, ti Presidente iti Discolandia ditoy ciudad ti Laoag ket naragsakan iti possible a panaglukat manen ti cockpit arena.
Kuna na a no matuloy daytoy nga addang ket dakkel a pakabenepisyaran da.
Segun kenkuana, kaadoan kadagiti mangabak iti galyeraan ket agturong da met iti discolandia rason a dakkel ti mapastrek da.
Mainaig iti daytoy, kuna met ni Barangay Kagawad Ferimer Aquino iti Barangay 1 ditoy ciudad ti Laoag a no aniaman ti mapagnunumoan dagiti opisyales ditoy ciudad ket sidadaan da a sumurot.
