LAOAG CITY – Inbatad ni Police Major Arnel Tabaog, ti chief of police iti ili ti Bacarra nga agtultuloy ti imbestigasyon da mainaig iti naibelleng a bangkay ti kaipasngay a maladaga a lalaki iti Bislak River iti nasao nga ili.
Inpakaammo na nga addan ti koordinasyon da kadagiti police stations iti kabangibang da nga ili kangrunaan na iti ili ti Vintar ken Pasuquin tapno amwen da kadagiti masakupan da a lugar dagiti masikog a babbai a possible a nangipasngay iti nasao a maladaga.
Mainaig iti daytoy, kuna ni Tabaog a basar iti pannakaeksamen ti bangkay ti maladaga ket possible nga addan makalawas a naibelleng iti karayan gapu ta nangrugin nga agrupsa ti bangkay na.
Innayon na a ti assessment da ket sibibiag paylaeng ti maladaga idi inbelleng ti awan asina nga ina iti Bislak River.
Immun-una iti daytoy, kuna ni Tabaog a mamisaan nga umuna ti bangkay ti maladaga iti simbaan katolika sakbay a maitabon iti kamposanto.
Maipalagip nga idi malem ket nakigtot dagiti sumagmamano a mangngalap idi nakita da ti agtatapaw a bangkay ti kaipasngay a maladaga iti bislak river kabayatan ti papanda koma panagsigay ti lames.
