LAOAG CITY – Nabirukan ti bangkay ti maysa a lalaki a maipagarop a biktima ti hit-and-run iti national highway a paset ti Barangay Tabug iti ciudad ti Batac.
Nabigbig ti biktima a ni Reynaldo Aganus y Dutdut, addaan iti umno a tawen, naasawaan, awanan ti trabaho ken residente iti nadakamat a barangay.
Iti imbestigasyon dagiti kameng ti Philippine National Police (PNP) iti ciudad ti Batac, kabayatan ti panagturong iti talon na ti maysa a residente nga agnagan ti Efgel Galarce, agtawen ti 44, naasawaan, mannalon ken residente met lang iti nasao a lugar idi nakita na ti nakadasay a biktima iti igid ti kalsada.
Segun met iti maysa pay a residente iti nasao a barangay a ni Armando Pano y Gallardo, 41, naasawaan ken mannalon, kabayatan ti kaadda da iti uneg ti balay da idi rabii ket nakangngeg ti arigna adda nanalbaag iti kalsada.
Kas resulta, ti biktima ket nagsagaba ti nakana a sugat iti ulo na ken indeklarar ni Dr. Dimpna Cecilia B. Diño-Sare iti City Health Office (CHO) a pimmusayen.
Narekobre iti nakapasamakan ti insidente ti debris ti Mitsubishi Mirrage ken agpapan ita ket saan pay a nabigbig ti suspek.
Agtultuloy ti imbestigasyon dagiti otoridad mainaig iti nasao nga insidente.
