LAOAG CITY – Makidanggay ti Ilocos Norte iti selebrasyon ti “National Hospital Week” iti masungad a lawas.
Mainaig iti daytoy, agbalin a “host” iti “flag raising ceremony” wenno iti pannakaibayog ti bandera ti pagilian iti sangoanan ti kapitolio probinsial ti Mariano Marcos Mem. Hospital and Medical Center.
Segun ken ni Mr. Gervy James Gumarit, mangidadaulo ti Provincial Communications and Media Office, adda ti maisayangkat nga ababa a programa kalpasan a maibayog ti bandera ken ni Gob. Matthew Marcos Manotoc ti kangrunaan a sangaili ken agsarita.
Inbatadna a kalpasan ti programa ket maisaruno a dagus ti “Hataw Exercises” a dakkel a tulong iti pannakatagiben ti salun-at.
Pakaseknan daytoy, nakiddaw ti panagarwat dagiti amin nga empleado ti “zumba outfit” kangrunaanna ti Maki-M3 T-shirt manipud iti Ilocos Norte Sports Development Office wenno ti frontliner T-shirt manipud iti Office of Barangay Affairs.
Inlawlawag ni Gumarit a kas paset ti selebrasyon, mangisayangkat ti Provincial Disaster Risk Reduction Management Office wenno PDRRMO babaen ken ni Mr. Marcell Tabije, local disaster risk reduction management officer ti Standard First Aid and Basic Life Support – Cardio Pulmonary Resuscitation with Automated External Defibrillator training.
Kunana a tunggal departamento ti gobierno probinsial ket nasken a mangipatulod iti maysa wenno dua a makipartisipar iti nasao a training.
Innayonna a maisayangkat ti nasao a panagsanay manipud Agosto kinse agingga ti diyes y otso.
