Ilunglungalong ti gobierno ti dakdakkel a pagpuonan iti chip design, engineering ken research kalpasan nga immabot iti US$64 billion ti rekord ti exports ti pagilian iti umuna a walo a bulan ita a tawen 2026 gapu iti panagdur-as ti electronics ken semiconductors industry.
Segun ken ni Executive Secretary Ralph Recto, mangidadaulo iti Semiconductor and Electonics Industry Advisory Council (SEIAC), pammaneknek ti panagdur-as ti in-inot a dumakdakkel ti papel ti pagilian iti global technology supply chain, manipud iti manufacturing ken assembly nga agturong iti nangatngato a lebel ti teknolohia.
Basar iti Philippine Statistics Authority, umaboten iti US$9.1 billion ti exports idi Agosto, kangatoan iti uneg ti 35 a tawen. 68 a porsiento ditoy ket binukel ti Electronics products, katukadna daytoy ti US$6.2 billion.
Manipud Enero agingga Agosto, dimur-as iti 26.2 porsiento ti electronics exports ken immabot ti US$37.1 bilyon. Nagtalinaed a kangrunaan a destinasion ket ti Estados Unidos no sadinno nagun-od ti US$12.3 billion a gatad dagiti produkto a Pilipino.
Inngato met ti Semiconductor and Electronics Industries in the Philippines Foundation, Inc. (SEIPI) iti 10 porsiento ti forecast a panagdur-as ti electronics exports ita 2026, iti tengnga ti ngumatngato a demand para iti artificial intelligence (AI) ken data centers.
Pakairamanan dagiti manamnama a mangpapigsa iti industria ket ti plano a panangpalawa ti Toshiba iti operasionna iti pagilian iti sumaruno a tallo a tawenn a manamnama nga agaramid ti 3,000 a trabaho.
Target ti baro nga industry roadmap nga umabot iti US$110 billon ti tinawen nga exports inton 2030, kagiddan ti panangpalawa ti semiconductor assembly, testing ken packaging, ken electronics manufacturing services.
Kabayatanna, manamnama a mangaramid ti ad-adu a trabaho ti Luzon Economic Corridor ken dagiti plano a technology hub iti nagduduma a paset ti pagilian, kas paset ti pananggutigt ti nangatngato a gatad ti pagpuonan ken mapalawa ti oportunidad para kadagiti mangmangged a Pilipino.
