LAOAG CITY – Naannayas ti pannakaiyuswat ti search warrant operation iti Brgy. Labut, Badoc, Ilocos Norte.
Nabigbig met ti subject ti operasyon a ni Mark Kevin, agtawen ti 29, naasawaan, maysa a security guard ken residente iti nasao a barangay.
Naipatungpal ti operasyon babaen ti nagtitipon a pwersa ti PNP-Badoc nga idadaulwan ni Police Major Joseph Tayaban, ACOP ken Provincial Intelligence Unit (PIU) kas lead Unit iti superbisyon ni PLT COL JONATHAN B PAPAY, C, PIU ken ti Regional Intelligence Division (RID), ken 2nd PMFC.
Ti Search Warrant ket inparuk-at ni Honorable Executive Judge Jacinto Merin Dela Cruz Jr. iti RTC Branch 33, Bauang La Union.
Nakumpiskar met dagiti otoridad ti maysa cal. 38 revolver nga awanan ti Serial Number.
Inimatangan met ni Barangay Chairman Edgard Laeda, Brgy Kagawad Richard Taclay ti inventory ti nakumpiskar.
Naamoan a napaay ti suspek a nakaipresentar ti dokumento iti paltog a nakumpiskar.
Kabayatanna, isagsaganan ti PNP dagiti dokumento para iti pannakaipila ti kaso kontra iti suspek.
