LAOAG CITY – Inbatad ni Barangay Chairman Rolly Nacuray iti Barangay Isic-Isic iti ili ti Vintar a napigsa paylaeng ti danom iti Spillway iti paset ti Sitio Bato.
Inpakaammo na a basta napigsa ti tudo ket pumigsa ti danom iti nasao a lugar.
Segun kenkuana, daytoy laeng ti kakaisuna a pagdalanan dagiti lugan isut gapuna a kapilitan a magna da latta uray napigsa ti danom.
Maipalagip nga idi laeng kalman ket addda ti naiyanud a van no sadinno a nagtitinnulungan da kadagiti kabarangayan na nga inyaon tapno saan a maperdi no agtalinaed iti danom.
Inpakaammo ti kapitan a sipud adda ti poot na no sadinno nga agtawen daytoyen ti 42 ket kastoyen ti sitwasyon iti nasao a lugar.
Innayon na nga uppaten a resolusyon ti inpasa na iti gobierno lokal iti ili ti Vintar para iti pannakapasayaat ti nasao a lugar ngem agpapan maisursurat daytoy a damag ket awan pay ti nalawag a pannaka-aksyon na.
Mangnamnama ti kapitan nga iti kabiitan a panawen ket mapasayaaten ti dalan iti sitio Bato tapno saan a kakaasi dagiti dumalyasat kangrunaan na ket dandanin ti panagserrek dagiti estudyante kadagiti pagadalan.
