LAOAG CITY – Possible nga adda ti rason ni Senador Robin Padilla no apay nga inlungalong na ti gakat para iti pannakapagbalin a legal ti civil unions of same-sex couples ditoy pagilyan.
Daytoy ti inbatad ni Mr. Ismael Ali, ti Presidente ti Ilocos Norte United Muslim Association (INUMA) ditoy ciudad ti Laoag.
Inlawlawag ni Ali a no iti pammati da iti Islam ket saan a mabalin nga agdenna ti dua nga indibidual nga agpada ti kinatao na.
Inpetteng na nga iti naipadal kadakuada iti relihiyon da ket masapol a ti babai ket para laeng iti lalaki, kasta met ti lalaki para laeng iti babai.
Nupay kasta, dagiti dadduma a pada na a muslim ket adda met ti pammati da a mabalin nga adda ti kayat a maamoan ken adda ti rason ni senador Padilla iti panangilungalong na iti nasao a gakat.
Innayon ni Ali nga iyuray da laengen no ania ti agbalin a palawag ni Padilla iti nagbalin nga addang na.
