LAOAG CITY – Nadismaya dagiti naruay a tattao gapu ta saan da manen a nakaala ti educational assistance iti maikadwa a sabado a panagibunong ti Department of Social Welfare Development (DSWD) ditoy probinsya.
Iti pannaki-innuman ti Bombo Radyo Laoag kadagiti sumagmamano a napan nagpila iti sentral office ti DSWD ditoy ciudad ti Laoag, nagturong da paylaeng iti lugar idi rabii.
Daytoy ket tapno masigurado a maakomodar ida dagiti agpapaay iti DSWD ken makaala da ti pinansyal a tulong.
Naamoan a karaman kadagiti napan imyan iti sango ti opisina ti DSWD ket dagiti taga Solsona, Adams ken dadduma nga adayo nga ili ditoy probinsya.
Nupay kasta, nadismaya ken nakapungtot dagiti maseknan kalpasan a naibaga kadakuada a dagiti laengen napatuludan ti mensahe ti makaawat ti education aid ita nga aldaw.
Innayon da a naibilin kadakuada a masapol nga iti opisina ti DSWD iti ili da ti pagturungan da nga umuna.
Inpakaammo dagiti maseknan nga immuna a napan da iti DSWD iti ili da ngem naibaon da iti sentral office ditoy ciudad ti Laoag isut gapuna a napalalo ti luksaw, pannakadismaya ken pungtot da kalpasan a naibaga manen kadakuada nga iti bukod da a lugar ti umuna a pagturungan da.
