LAOAG CITY – Inkari ni Presidente Ferdinand “Bongbong” Marcos Jr. ti pannakaipaay ti naan-anay a pagsayaatan dagiti Overseas Filipino Workers (OFWs) iti intero a lubong.
Daytoy ti inrakurak ni Bombo International News Correspondent Jethromel Meneses iti Indonesia.
Segun ken ni Meneses, iti pannakisango ni Presidente Marcos iti Filipino Community idiay Indonesia ket inyam-ammo na dagiti miembro ti gabinete na.
Innayon na nga inpasigurado kadakuada ti presidente a paigetan na ti bilateral agreement ti Pilipinas ken Indonesia.
Inbatad pay ni Meneses a naibaga ti presidente a dagiti OFWs idiay Indonesia ket Ambassador of Goodwill.
Kuna na a saan a nalipatan ti presidente ti nagyaman kadagiti amin a Pilipino idiay Indonesia gapu ta naglayos ti botos na iti nasao a pagilyan iti napalabas nga eleksyon.
Kabayatanna, inbatad met ni Bombo International News Correspondent Myla Castillo iti Jakarta, Indonesia a namnamaen na nga iti panagtaripnong da Presidente Marcos ken ni Indonesian Presidente JOko Widodo ita nga aldaw ket ad-adda pay a mapatibker ti relasyon ti dua a pagilyan.
Mangnamnama pay ni Castillo a mapagsaritaan dagiti dua a lider ti pannakaipaay ti umiso a trato para kadagiti amin nga OFWs iti Indonesia ken mapaalisto ti proseso iti panagala ti visa iti nasao a pagilyan.
