LAOAG CITY – Inpalagip manen ni Mrs. Cherry Joy Garma, ti Information Officer ti DepEd Ilocos Norte ti No Contribution Policy kadagiti amin nga Elementarya ken Sekondarya a pagadalan.
Segun kenni Garma, ti DepEd Order No. 19 Series of 2018 wenno ti implementasyon ti no collection policy ket nabayagen nga ipatpatungpal ti departamento.
Inpetteng na a no adda ti aglabsing iti daytoy ket sumango iti administrative complaints no siasinno ti nagpakontribusyon.
Mainaig iti daytoy, kuna ni Garma a ti met PTA ket maysa nga independent body ken adda ti set ti opisyales iti daytoy.
Inlawlawag na a no adda ti mapagtutalagan a kontribusyon ken immanamong met dagiti nagannak ket awan ti kontrol ti Deped.
Nupay kasta, kunana a masapol a makikoordinar ti PTA iti pagadalan iti anyaman a plano da ken maipakita ti pakaipatungpalan no adda ti makolektar.
Kabayatanna, binalakadan pay ni Garma dagiti mangisursuro a saan a makigamulo iti pondo ti PTA nangruna ket adda met ti bukod nga opisyales ti asosasyon.
