LAOAG CITY – Ginandat ti maysa a balasang ti agpakamatay babaen ti panaglemmes na koma iti Bolo River iti Barangay Tarrag iti ili ti Pagudpud.
Ti biktima ket agtawen ti 18, balasang, estudyante iti Mariano Marcos State University (MMSU-CIT) ken residente iti Barangay Lanao iti ili ti Bangui.
Segun ken ni Police Major Joemar Andres, ti chief of police iti ili ti Pagudpud, nagtapwak ti biktima iti rangtay ken nakita daytoy dagiti kameng ti pulisya a naka-assign iti protect box (cul de sac) a masarakan iti welcome arko iti nasao nga ili.
Inbatad na a saan a nagpangadua ni Patrolman Carl Jhan C Bumanglag, miembro ti 3rd Platoon 1st PMFC iti babaen ti panangidaulo ni Police Lt. Col. MARCELIANO DESAMITO ket nagtapwak iti karayan ken napanna insalakan ti nasao nga estudyante.
Inpakaammo ni Andres a ti maipagarop a rason ti balasang no apay a ginandat na ti aglemmes ket gapu iti maipagarop a depresyon.
