LAOAG CITY – Kidkiddawen ni Mr. Edgar Lao, Presidente ti Disco owners iti Barangay 1 ditoy ciudad ti Laoag a saan laeng a dua a tawen ti masapol a panagtalinaed da iti nasao a lugar.
Segun kenni Lao, no mabalin ket maiyatiddog pay ti maysa agingga iti dua a tawen tapno naan-anay a makarekobre da manipud iti epekto ti covid-19.
Inbatad ni Lao a nangrugi da laeng idi Pebereo 14 ita a tawen a nagoperar ken saan da pay unay a naan-anay a nakarekobre.
Ummuna iti daytoy, kalikagom ni Mayor Michael Marcos Keon a kalpasan ti dua a tawen ket maiyakar dagiti discohouses pakairamanan ti galyeraan.
Mainaig iti daytoy, kunana nga iti manamnama a panagoperar ti galyera ket dakkel a tulong kadakuada a disco owners.
Kabayatanna, inbatad na a nagtutulag dagiti amin a disco owners nga apaman nga agoperar ti galyera ket agtitinnulong da para iti linak ken talna.
Innayon na a no isuda ti masurot ket saan da kuma a maiyadayo manipud iti agdama a pwesto da.
